De Rosalía ás Cantareiras en Muxía

O venres 16 de maio ás 19:00 horas terá lugar no Albergue Bela Muxía o evento “De Rosalía ás Cantareiras”, unha celebración do Día das Letras Galegas 2025 centrada na música tradicional e na figura das mulleres cantareiras.

A cita contará coa actuación dos grupos de pandeireteiras da Universidade Popular de Corcubión, As Xaviñanas e As Rinchonas, que ofrecerán un repertorio enraizado na cultura popular galega. Esta proposta pretende achegar ao público a forza expresiva da nosa música tradicional a través da voz e o ritmo das pandeireteiras.

Nesta edición das Letras Galegas, renderase homenaxe á cantareira muxiá Eva Castiñeira Santos, recoñecendo o seu papel na conservación e transmisión do noso patrimonio inmaterial. O evento está organizado pola Asociación Cultural Xervasio Paz Lestón e a Universidade Popular de Corcubión, coa colaboración da Deputación da Coruña.