Escora Danza Costa da Morte

A quinta edición de Escora Danza Costa da Morte comezará o sábado 6 de xuño en Vimianzo e percorrerá tamén os concellos de Corcubión, Malpica de Bergantiños e Mazaricos. O ciclo, impulsado pola Área de Cultura da Deputación da Coruña, aposta pola danza contemporánea, a música tradicional, a creación escénica internacional e o diálogo co territorio.

Esta nova edición pon o foco na mediación cultural, na participación social e na diversidade de corpos, idades e formas de entender a danza. Escora propón unha programación próxima, accesible e conectada coa comunidade, levando as artes do movemento a diferentes espazos da Costa da Morte.

• Sábado 6 de xuño, Vimianzo: a Casa da Cultura acollerá desde as 18:30 h a xornada inaugural, coa participación dos Coros de Cereixo e Carnés xunto coa danza de Eva Comesaña. Tamén se representará Ma p’tite dame, da creadora francesa Claire Heggen, na súa primeira actuación en Galiza. Entrada de balde ata completar cabida.
• Domingo 7 de xuño, Corcubión: programa coas pezas Ouveo, de Mikel Aristegui, Son libre, de Mikel Aristegui e Clara López Villar, e a presentación de As pegadas do baile, de Artur Puga.
• Sábado 13 de xuño, Malpica de Bergantiños: o porto acollerá os espectáculos SO-FA(R) FROM ME, proposta aérea da compañía Martaalonsotejada, e O. Que todo volva comezar, da AC Raigañas, dirixido por Rut Balbís.
• Domingo 14 de xuño, Mazaricos: o recinto feiral da Picota será o escenario de Traktor, coa veciñanza de Mazaricos, baixo a dirección e coreografía de Anuska Fernández e coa colaboración de Yas Deluaces; e de A noite do cuco, de Jandross Rodríguez. A xornada rematará cunha sesión DJ a cargo de WG83.

Escora Danza Costa da Morte é unha oportunidade para descubrir a danza como unha linguaxe viva, aberta e compartida, capaz de crear vínculos entre artistas, veciñanza, asociacións e concellos.