Carballo dá comezo ao Verán Cultural 2025

O Concello de Carballo inicia o seu Verán Cultural cunha semana chea de propostas para todas as idades. O ciclo Noites de Cine levará películas a distintos espazos do municipio, comezando o mércores 10 de xullo ás 22:30 h na praia de Razo coa comedia galega +Cuñados.

Do 10 ao 13 de xullo, o Xardín Municipal converterase na Praza dos Libros, cun completo programa de presentacións, contacontos, sinaturas, actividades para cativas e cativos e descontos en oito librarías locais. Ademais, haberá premios e agasallos por cada compra, como conservas ou pan de Carballo.

O venres 12 de xullo, a Praza do Concello acollerá o espectáculo 50 (1975–2025) do Mago Antón, que celebra medio século de maxia e ilusión cun show familiar. Haberá catro sesións (ás 13.00, 17.00, 18.30 e 20.00 h) e as entradas, de balde, poderán reservarse previamente.