Homenaxe a Luz Casal como Filla Adoptiva de Camariñas

A Casa do Concello de Camariñas acollerá o mércores 29 de xullo de 2026 un pleno extraordinario de carácter festivo e un acto de homenaxe a Luz Casal co gallo do seu nomeamento como Filla Adoptiva do municipio. A sesión estará aberta ao público e contará coa presenza da cantante.

O Concello de Camariñas concederalle a súa máxima distinción para recoñecer a súa traxectoria artística e o seu papel como embaixadora da vila. A súa emblemática interpretación da cantiga tradicional «Camariñas» levou o nome da localidade a públicos de todo o mundo e a algúns dos auditorios máis prestixiosos.

A peza, recuperada da tradición oral e convertida nun clásico da música folk por Luar na Lubre a finais dos anos noventa, acadou unha nova dimensión cando Luz Casal a incorporou ao seu repertorio. Na súa voz converteuse nun vínculo entre Camariñas, o mar, a veciñanza, a diáspora e as persoas amantes da música.

A artista, natural de Boimorto, recibiu a noticia con emoción e agradecemento, e afirmou que este recoñecemento supón para ela «un honor grandísimo». Con este nomeamento, o Concello e a veciñanza de Camariñas reforzan o estreito vínculo de Luz Casal coa terra das palilleiras.