Rutas do Mar 2025 – Festa Mariñeira de Muxía

Chega unha das festas máis agardadas do verán en Muxía! Os días 9 e 10 de agosto celebramos a 17ª edición de Rutas do Mar, unha cita única coa nosa tradición mariñeira, a nosa cultura e a nosa gastronomía.

Muxía convértese nun espazo cheo de vida, coa súa feira mariñeira, os postos de artesanía local, concertos en directo e unha mostra gastronómica que pon en valor os produtos do mar e da terra.

A festa incluirá pasarrúas, animación para todos os públicos e unha programación pensada para gozar en familia ou entre amizades, nun ambiente de convivencia e tradición.

Rutas do Mar é xa un referente na Costa da Morte, un encontro anual que reivindica o noso patrimonio mariñeiro e o espírito acolledor desta vila atlántica.