Presentación do libro “A Costa da Morte. Naturalmente única”

A Costa da Morte dará un novo paso na súa promoción turística coa presentación do libro “A Costa da Morte. Naturalmente única”, unha publicación exclusiva que reúne aos 17 concellos do Xeodestino. O evento terá lugar o xoves 4 de decembro de 2025, ás 12:00 h, no Asteria Beach de Caión (A Laracha), e está organizado pola APTCM coa colaboración da Axencia de Turismo de Galicia, cuxo director, José Manuel Merelles, asistirá ao acto.

O libro “A Costa da Morte. Naturalmente única” ofrece unha mirada moi persoal de Xan Fernández Carrera e das fotografías de Antonio Fernández sobre os recursos turísticos da nosa bisbarra. Trátase dunha edición de formato especial, con cuberta dura, papel de gran calidade, grandes imaxes e textos breves, pensada para lucir en recepcións, mostradores de establecementos turísticos e oficinas de información. Cun peso de 1,5 kg, converte cada páxina nunha invitación a descubrir un territorio único.

Na presentación do libro farase entrega de exemplares a todos os concellos integrados na CMAT (Costa da Morte Asociación Turística), ás oficinas de turismo, ás bibliotecas municipais e ás persoas socias da APTCM. Desde a entidade quérese agradecer publicamente a Xan Fernández Carrera e Antonio Fernández a súa paixón, o seu talento e a xenerosidade de ceder a súa obra de xeito altruísta en favor desta terra. A presentación de “A Costa da Morte. Naturalmente única” é a mellor proba de que a unión fai a forza e de que, cando miramos todas e todos na mesma dirección, os obxectivos chegan antes.