Muinhada de Vimianzo 2026 – XI Antropofesta

A Muinhada de Vimianzo 2026 regresa os días 16 e 17 de outubro coa XI Antropofesta, dúas xornadas nas que os muíños da vila volven encherse de música, baile, teatro, tradición e cultura popular galega. Unha festa feita a man, con identidade propia, que converte diferentes espazos de Vimianzo en punto de encontro para públicos de todas as idades.

Venres 16 de outubro: documental, concertos e foliada aberta

A programación comeza ás 19:00 h na Casa da Cultura coa presentación do documental “O río do Porto, o río grande da Terra de Soneira”, de SEMESCOM.

Pola noite, o Muíño da Agra e o Palco do Tarabelo acollerán o ciclo “Unha noite non é nada!”: ás 22:00 h actuará Axeigo, ás 23:30 h será a quenda das Pandeireteiras de Xacarandaina e, desde a 01:00 h, haberá foliada aberta.

Sábado 17 de outubro: música, teatro e tradición arredor dos muíños

O sábado arrinca ás 12:00 h no Muíño das Pasantes con Avelino González. Ás 13:15 h, o Muíño da Gándara acollerá a sesión vermú con Do Rivés.

A tarde continuará no Muíño da Agra coa visita teatralizada de Teté Teatro ás 16:30 h e coa exposición “Derradeiro. Os últimos muíños”. Tamén haberá artesanía, xogos do millo e un obradoiro de brinquedos sonoros con Zuca-Truca ás 17:00 h. Ás 18:00 h chegará o tradicional campionato de debullado, seguido de foliada ás 19:00 h e cea tradicional ás 20:00 h.

Noite de concertos na Muinhada

O Palco da Maquía, no Muíño da Agra, concentrará a música da noite: Benofán Charanga ás 22:00 h, Alana ás 23:30 h e DeLaMeseta á 01:00 h.

Entradas para a Muinhada de Vimianzo 2026

As entradas para a sesión vermú e a noite do sábado xa están á venda en liña. Pódense mercar en Woutick.

A XI Antropofesta está organizada por A.C. Cherinkas e o Concello de Vimianzo, co patrocinio de Cultura da Deputación da Coruña e a colaboración de O Ariete, SEMESCOM e A.C. Trubisquiña Vimianzo.