Limpeza de praias con Diversiplás na Costa da Morte

A Costa da Morte suma este setembro tres novas xornadas de limpeza de praias da man de Diversiplás, o proxecto de Íntegro que une sensibilización ambiental, economía circular e inclusión. A iniciativa percorrerá os areais de Traba, Ariño e Balarés cun convite aberto a implicarse no coidado do litoral e na redución dos residuos plásticos que chegan ao mar.

Calendario das limpezas de praias

• 2 de setembro: Praia de Traba, en Laxe.
• 9 de setembro: Praia do Ariño, en Camariñas.
• 14 de setembro: Praia de Balarés, en Ponteceso.

As tres xornadas propoñen pasar á acción retirando residuos da contorna costeira e, ao mesmo tempo, lembrar que moitos dos plásticos abandonados en terra acaban chegando ao océano. Unha oportunidade para colaborar de maneira directa na conservación dalgunhas das praias máis representativas da Costa da Morte.

Xornada de portas abertas de Diversiplás

O 4 de setembro celebrarase ademais unha xornada de portas abertas no obradoiro Diversiplás, en Nantón, onde se poderá coñecer que ocorre cos residuos plásticos despois da súa recuperación e como poden transformarse en novos produtos dentro dun modelo de economía circular.

Para esta visita ao obradoiro é necesaria inscrición previa. Tamén se pode solicitar información sobre a participación nas xornadas de limpeza nos teléfonos 981 734 985 e 650 961 649.

Un proxecto por un océano sen plástico

Diversiplás é unha iniciativa de Íntegro centrada na recuperación e valorización de residuos plásticos, combinando protección ambiental e inclusión social. O proxecto conta co cofinanciamento da Unión Europea e da Xunta de Galicia, co apoio do GALP Costa da Morte.