Exposición “Aires da Terra” en Baio

O Centro Sociocultural de Baio inaugura o vindeiro 30 de marzo ás 18:00 horas a exposición Aires da Terra, unha mostra da artista Isabel Soutullo coa que o Concello de Zas continúa a reforzar a súa aposta por unha programación cultural estable e de calidade. A proposta abre unha nova xanela á arte contemporánea na comarca e convida á veciñanza e ás persoas visitantes a achegarse a unha obra chea de sensibilidade e reflexión.

Aires da Terra en Baio poderá visitarse de balde ata o 30 de abril, de martes a venres de 15:30 a 20:30 horas e os sábados de 10:00 a 14:00 horas. Nada en Coristanco, Isabel Soutullo destaca pola súa capacidade para abordar cuestións de conciencia social e ambiental a través dunha pintura que busca o equilibrio entre o figurativo e o abstracto, creando espazos nos que emocións e ideas se entrelazan.

A artista conta cunha ampla traxectoria expositiva, especialmente ligada á provincia da Coruña e á Costa da Morte, onde xa presentou o seu traballo en distintos espazos culturais e institucionais. Ademais, forma parte do colectivo Galeoska, o que reforza o interese desta exposición en Baio como unha oportunidade para descubrir unha creadora da contorna que leva o nome do territorio máis alá a través da súa obra.