Actividades sobre o eclipse solar 2026 en Vimianzo

Vimianzo prepárase para vivir e comprender mellor un dos grandes acontecementos astronómicos dos vindeiros anos cunha xornada especial centrada na eclipse solar de 2026. Esta proposta divulgativa, organizada polo Concello, busca achegar o fenómeno a todos os públicos con actividades pensadas para aprender, observar e gozar do ceo con seguridade.

A programación do 17 de abril combina divulgación científica, observación e experiencias astronómicas en distintos formatos. Ademais de axudar á cidadanía a entender que é unha eclipse e como se produce, esta iniciativa tamén reforza o posicionamento de Vimianzo como destino vencellado ao turismo astronómico e á observación do ceo nocturno.

Programación do evento:

• Charlas escolares — Durante a mañá do 17 de abril. Actividades didácticas dirixidas ao alumnado para explicar que é unha eclipse, como se produce e como debe observarse de maneira segura.
• Charla aberta ao público xeral — 17 de abril, ás 19:00 horas, na Casa da Cultura de Vimianzo. Sesión divulgativa para coñecer as claves do fenómeno astronómico e as recomendacións para a súa observación.
• Observación nocturna guiada — 17 de abril, ás 22:00 e 23:00 horas, no miradoiro de San Bartolo, na parroquia de Salto. Observación a través de telescopio e percorrido guiado por estrelas, constelacións e historias do ceo nocturno.

As actividades estarán impartidas por Javier Ares e contan coa colaboración da Asociación Astroturismo da Costa da Morte.