Cheny Wa Gune en Corcubión

O 4 de outubro de 2026, ás 20.00 h, o Auditorio da Casa da Cultura de Corcubión acollerá a actuación de Cheny Wa Gune, músico, compositor, intérprete, produtor, docente e investigador mozambicano.

Cheny Wa Gune

Nado en Maputo en 1980, é un dos referentes na difusión da música e dos instrumentos tradicionais de Mozambique, especialmente da timbila, o chitende, a chigovia e a percusión, que combina con sons contemporáneos para crear unha linguaxe musical propia.

Cofundador de Timbila Muzimba e cunha ampla carreira en solitario, a súa música levouno a escenarios de África, Europa, América Latina e Asia, participando en numerosos festivais e proxectos de intercambio cultural. A súa relación con Galicia inclúe participacións en eventos como WOMEX Galicia 2016, Trad Fest de Santiago de Compostela e o Festival Maré.

Ao longo da súa traxectoria colaborou con artistas como Selma Uamusse, Jorge Pardo, Xixel Langa, Natali Natiambé e Hélio Beatz, e desenvolveu tamén unha importante actividade como docente e investigador, traballando na transmisión e preservación da tradición musical mozambicana.

Unha oportunidade para achegarnos á riqueza da música de Mozambique e descubrir unha proposta que une tradición, creación contemporánea e intercambio cultural.

Información práctica

• Data: 4 de outubro de 2026
• Hora: 20.00 h
• Lugar: Auditorio da Casa da Cultura de Corcubión
• Entrada: de balde

Organiza: Deputación da Coruña – A Cultura é un Dereito
Colabora: Concello de Corcubión