Pequen@s lector@s, grandes creacións nas Torres do Allo

As Torres do Allo celebran o Día das Letras Galegas cunha xornada especial pensada para achegar a lectura, a creatividade e a lingua galega aos máis pequenos nun dos espazos patrimoniais máis singulares da Costa da Morte. A actividade terá lugar o 16 de maio baixo o título “Pequen@s lector@s, grandes creacións”, dentro da programación cultural do Concello de Zas.

A proposta principal será un obradoiro creativo de elaboración de marcapáxinas, dirixido a nenos e nenas de entre 5 e 10 anos, así como a persoas adultas que queiran participar. Durante a actividade, as persoas asistentes poderán deseñar e personalizar os seus propios marcapáxinas empregando diferentes técnicas e materiais, nunha experiencia que une expresión artística, lectura e posta en valor do galego.

A xornada complétase coa exposición temporal “Os Riobóo, a saga do Allo”, visitas guiadas ás 13:00 e ás 17:00 horas e o xogo de pistas “O legado de Francisca”, unha proposta familiar para descubrir o conxunto patrimonial dun xeito participativo. Todas as actividades son de balde, pero requiren inscrición previa nos Centros Socioculturais de Zas e Baio, nos teléfonos 981 751 398 e 981 718 056, ou no correo info@torresdoallo.gal.