Feira das Letras en Baio

A Feira das Letras en Baio chega do venres 8 ao domingo 10 de maio cunha fin de semana chea de libros, cultura, música, actividades familiares e tamén sabor local. A proposta, que une Baio ten a pelota coa Feira do Libro, converterá a vila nun punto de encontro para mercar, pasear, descubrir novas lecturas e gozar dun ambiente moi especial nas rúas.

Durante os tres días haberá ata un 20% de desconto nas tendas, en horario de 10:00 a 14:00 e de 16:00 a 21:00 horas, ademais dunha ruta de tapas con servizo de 12:00 a 16:00 e de 19:00 a 23:00 horas. A actividade principal desenvolverase na praza Jorge Mira, excepto as charangas e pasarrúas, que serán itinerantes polas rúas de Baio, enchendo a localidade de música e ambiente festivo.

O programa inclúe a apertura da carpa da feira, presentacións literarias como “Begoña Caamaño”, “Gorrións e Falcóns” ou “O mapa da túa sexualidade”, propostas de memoria histórica arredor da represión e o franquismo na Costa da Morte, proxección da película “San Simón”, diversión infantil con rocódromo, tirolina e inchables, ademais das actuacións da Charanga Os Celtas, Churía e AC Adro, Os Atrevidos e varios pases do Mago Antón. Unha cita perfecta para vivir Baio con libros, comercio, hostalaría e moita vida na rúa.