XIII Víndemo Ver ao Solpor en Carnota

Carnota volve facer do Víndemo Ver unha viaxe pola memoria e pola identidade local, e este 2026 faino cun protagonista que xa é parte do noso imaxinario: o Solpor. Do 2 ao 5 de abril, a praza de San Gregorio converterase nun espazo para pasear, mercar produto de proximidade e vivir a feira con calma, entre tradición, artesanía e ambiente festivo.

Durante os catro días haberá Mercado da Deputación con postos de horta, propostas ecolóxicas e artigos locais, xunto a artesanía, zonas de comida e bebida ao aire libre e unha chea de actividades para todos os públicos. A programación arrinca o xoves 2 ás 17:00 h coa inauguración e a presentación do espectáculo audiovisual inmersivo “Os nosos ceos: Costa da Morte” (Antonio Nodar e Frank Bushmann). O venres 3 chega a proba BTT con saída ás 09:30 h dende o pavillón de Carnota, e en paralelo a xincana infantil de bicicletas dende as 10:30 h (bicicleta e casco propios). O sábado 4 será a Andaina do Solpor, un percorrido duns 12 km con saída ás 18:30 h dende a praza de San Gregorio (traslado en bus ao inicio e ruta maioritariamente pola ladeira do monte de Carnota).

Haberá tamén xogos e obradoiros para a rapazada, música e cultura tradicional (Banda de Gaitas Longarela, Charanga Santa Compaña e Agrupación Folclórica Ximiela) e concertos para animar as noites: xoves 2 (22:00 h) Chiña e karaoke; venres 3 (22:00 h) Los Lunes al Sol e The Balayos; e sábado 4 Tian GZ, Xian Pais e Ortiga. Durante todo o evento poderanse visitar as exposicións “En busca del rayo verde. Atardeceres en el último segundo del sol” (Ana García) e “Un mar de cunchas”. E para completar a experiencia… vinde caracterizados da época e metédevos de cheo no espírito do Víndemo Ver.