Roteiro guiado en Baio: A vida secreta do río

O Concello de Zas convida veciños e visitantes a descubrir “A vida secreta do río” cun roteiro guiado polo paseo fluvial de Baio ata a carballeira municipal. Grazas a esta iniciativa, darase a coñecer a rica biodiversidade do río Porto, as especies autóctonas das súas ribeiras, as árbores e plantas características do ecosistema e a importancia da súa conservación.

O percorrido celébrase todos os martes e xoves do verán, con saída ás 12:00 h desde a Praza Jorge Mira Pérez e unha duración aproximada de 60 minutos. A inscrición é obrigatoria e debe realizarse indicando o día escollido a través do formulario https://bit.ly/PaseoFluvial25 ou chamando ao 981 71 80 56.

“Con esta actividade, o Concello de Zas reafirma o seu compromiso coa educación ambiental e coa posta en valor dos espazos naturais do municipio, ofrecendo alternativas de lecer sostible e de calidade durante os meses de verán, ao mesmo tempo que pon en valor un dos espazos mellor conservados da Costa da Morte”, sinala o alcalde, Manuel Muíño.