Festas do Carmen de Camelle 2025

Do 1 ao 3 de agosto, Camelle converterase no epicentro da celebración coa súa tradicional Festa do Carme, que encherá o porto de música, procesións, verbena e animación para todos os públicos. O venres día 1 comezará cunha gran churrascada amenizada polo Dúo Musical Calú e continuará coa Gran Noite Camelle Fest, que contará coa disco móbil Impacto e actuacións de artistas como TSS Project, Marcos Magán, David Bermúdez, Dreno Korme, Cotelo e BS.

O sábado día 2 terá lugar a tradicional procesión marítima da Virxe do Carme, coa saída da imaxe dende a igrexa cara ao peirao, acompañada pola Danza de Arcos e o Grupo de Gaitas Gholpe de Mar. Ás 12:00 celebrarase a misa solemne e, xa pola noite, haberá verbena coa orquestra Escaparate, seguida da disco móbil Impacto con DJ Nyan Boe e Andy Grape.

O domingo 3 de agosto, Camelle despedirá a fin de semana festiva cunha misa solemne en honra á Virxe dos Remedios, cantada polo coro polifónico. A procesión estará acompañada tamén pola Danza de Arcos e Gholpe de Mar. Pola tarde e noite, haberá sesión vermú e verbena coa orquestra Atenas, seguida dunha nova sesión de disco móbil a cargo de DJ Sonic. Unha festa á beira do mar que combina o mellor da tradición e da verbena galega.