Vento do Nordés en Camelle 2025

Do 19 ao 21 de agosto de 2025, Camelle acollerá as xornadas Vento do Nordés, un encontro cultural baixo o lema “Palabras que levan a cultura do noso mar”. Tres días dedicados á memoria mariñeira da Costa da Morte, con actividades que combinan historia, tradición e divulgación.

O martes 19 inaugurarase o programa coa actuación de Jolpe de Mar, unha visita guiada á Sala dos Naufraxios e o faladoiro A memoria da pesca en Camelle. O mércores 20 haberá un obradoiro de nós mariñeiros, visita guiada e a charla Unha vida adicada á construción de barcos co carpinteiro de ribeira Xerardo Triñanes.

O xoves 21, o obradoiro de iniciación á construción de barcos dará paso a unha nova visita guiada e ao roteiro teatralizado A pegada da época dos naufraxios en Camelle, que rematará coa actuación das pandereteiras Mar Devalado. Un evento que pon en valor a riqueza cultural e mariñeira de Camelle, no marco incomparable do Museo de Man e o paseo marítimo.