Letras Galegas 2026 no Concello de Zas

O Concello de Zas conmemora as Letras Galegas 2026 cun amplo calendario de actividades culturais durante todo o mes de maio, dedicado este ano á escritora e xornalista Begoña Caamaño. A programación reúne propostas literarias, musicais, teatrais, exposicións, animación á lectura e iniciativas educativas pensadas para achegar a cultura e a lingua galega á veciñanza de todas as idades.

As actividades arrancaron coa Feira das Letras na Praza Jorge Mira de Baio, organizada polo Concello de Zas e a Asociación BaiON, e continúan con exposicións nos centros socioculturais, o XVI Concurso de Marcapáxinas para o alumnado dos centros de ensino e diferentes propostas para público infantil, familiar e escolar. Entre elas destacan os contacontos de Trinke Trinke, as funcións escolares da compañía Estatalá e a actuación de Os Meninos do Pandeiro.

O teatro terá tamén un papel protagonista na programación especial das Letras Galegas 2026 no Concello de Zas, cunha xornada o domingo 17 de maio na que se poderá gozar de dúas representacións: Dous no camiño, de Artefeito, na Área Recreativa do Reirís, e Sol Fuerza, de aAntena, no Auditorio de Baio. Unha celebración aberta, variada e moi vencellada á defensa da lingua, da creación galega e da vida cultural do municipio.

• Durante todo o mes de maio: XVI Concurso de Marcapáxinas, dirixido ao alumnado dos centros de ensino do municipio.
• Durante o mes de maio: exposición Cores da Alma, de José Maynat, no CSC de Baio.
• Durante o mes de maio: mostra do XIX Premio Internacional Luís Ksado de Creación Fotográfica, no CSC de Zas.
• Luns 11 de maio: ás 18:00 h, contacontos Traballiños de verán, de Trinke Trinke, na Axencia de Lectura de Baio.
• Martes 12 de maio: ás 18:30 h, contacontos Traballiños de verán, de Trinke Trinke, na Biblioteca Municipal de Zas.
• Martes 12 de maio: funcións escolares de O romance do gato, da compañía Estatalá, no CPI de Zas e no CEIP Labarta Pose de Baio.
• Venres 15 de maio: actuación de Os Meninos do Pandeiro para o alumnado do IES Maximino Romero.
• Domingo 17 de maio: ás 18:00 h, teatro con Dous no camiño, de Artefeito, na Área Recreativa do Reirís.
• Domingo 17 de maio: ás 20:00 h, teatro con Sol Fuerza, de aAntena, no Auditorio de Baio.