III Encontro Enoliterario Bela Fisterra 2025: viño, literatura e territorio

O sábado 7 de xuño de 2025, de 17:00 a 20:00 h, celébrase unha nova edición do Encontro Enoliterario Bela Fisterra, un evento pioneiro na Costa da Morte que mestura viño galego e literatura nun espazo único fronte ao mar, en Bela Fisterra (avda. da Anchoa, 56).

Despois do éxito das dúas edicións anteriores, este terceiro encontro volve con dous obxectivos principais: crear un espazo de diálogo entre autores, autoras e lectores sen barreiras —os libros non se venden e os viños son de balde—, e facilitar que o sector turístico da Costa da Morte coñeza e seleccione os mellores viños galegos para as súas cartas, con asesoramento experto de Luis e Alejandro Paadín.

Durante o evento, poderanse catar máis de 100 viños das 5 Denominacións de Orixe e IXP de Galicia mentres se comparten experiencias coas voces máis destacadas —e emerxentes— da escrita galega. Unha oportunidade perfecta para fomentar sinerxías entre cultura, gastronomía e turismo nun formato informal, aberto e creativo.