II Copa de España de Mushing

En 2025, a cita con este deporte será os días 8 e 9 de febreiro en Dumbría.

A organización, ao igual que na anterior ocasión, corre a cargo do Concello de Dumbría e o Club Alejandro Gómez. Contarase co apoio da Federación Española de Deportes de Inverno e tamén da Federación Galega.

O mushing é unha disciplina encadrada nos deportes de inverno na que os deportistas corren acompañados polos seus cans, os cales son os principais protagonistas e están protexidos por un regulamento que vela en todo momento polo benestar destes animais.

De novo, o escenario elixido para este evento en territorio dumbriés serán os montes de Buxantes, cun circuíto totalmente modificado, cunha nova situación. O percorrido será de 4 km e resultará accesible tanto para deportistas como para os espectadores que acudan a presenciar a competición.

Esta proba, de carácter nacional, traerá ata Dumbría a máis de 200 participantes.