Ciclo Mestre Mateo de Cinema en Vimianzo 2025

O Auditorio de Vimianzo será, por segundo ano consecutivo, sede do Ciclo Mestre Mateo de Cinema, unha iniciativa da Academia Galega do Audiovisual que achega ao público unha selección das obras finalistas dos premios Mestre Mateo. Do 27 de agosto ao 14 de novembro, este ciclo gratuíto ofrece unha ampla variedade de xéneros e formatos que amosan a diversidade e o talento do audiovisual galego, con entrada libre ata completar aforo e recollida de billetes unha hora antes de cada proxección.

A programación arrinca o mércores 27 de agosto (11:00 h) coa sesión infantil do programa Vimiverán, na que se proxectan curtametraxes como ‘Avetimoloxía’, ‘Noites de prata’, ‘Sinopse’, ‘Eu vou comigo’ e ‘Platónico, platónica’. O venres 12 de setembro (20:00 h) chega o thriller xuvenil ‘As Neves’, seguido o día 19 pola comedia ‘+ Cuñados’ e o 26 polo documental ‘Salvaxe, salvaxe’, que reflexiona sobre a pegada do lobo ibérico.

En outubro, o ciclo continúa o día 3 con tres curtametraxes (‘Nai’, ‘Véxote’, ‘Pura’) e o día 10 con ‘Aurora’, un drama profundo sobre o papel da muller. O 17 proxectarase ‘Filmei paxaros voando’, unha historia emotiva de reconciliación familiar, e o 24 ‘Prefiro condenarme’, documental sobre Sagrario, unha mariscadora xuízada por adúltera nos anos 70. Xa en novembro, o 7 verase a ficción futurista ‘Xustiza artificial’ e o 14 clausurará co drama ‘Honeymoon’ sobre a perda dun fillo.