Actividades de verán 2026 no Concello de Zas

O Concello de Zas reforza este verán a súa aposta pola conciliación familiar e polo lecer infantil cun amplo programa de actividades pensado para nenos, nenas e mocidade. A programación combina propostas educativas, deportivas e de convivencia, ofrecendo alternativas accesibles para que as familias poidan organizar mellor o período vacacional.

Entre as actividades previstas destacan os Campamentos de Verán municipais, o Depor Campus Zas e o Campamento Multideportivo, tres propostas diferentes que permitirán desfrutar do verán aprendendo, facendo deporte e compartindo experiencias nun ambiente seguro, dinámico e participativo.

• Campamentos de Verán: para nenos e nenas de 3 a 12 anos, do 22 de xuño ao 28 de agosto nas Torres do Allo, en cinco quendas. Horario de 10:00 a 14:00 horas, con servizo de madrugadores desde as 8:45 horas.
• Depor Campus Zas: para nenos e nenas de 6 a 14 anos, do 20 ao 24 de xullo no campo municipal Platas Reinoso, cunha experiencia deportiva centrada no fútbol da man do Deportivo da Coruña.
• Campamento Multideportivo: para mozos e mozas de 8 a 14 anos, do 20 ao 24 e do 27 ao 31 de xullo nos polideportivos de Baio e Zas, con xincanas, xogos, torneos e actividades deportivas.

As persoas interesadas poden solicitar máis información ou formalizar as inscricións nos Campamentos de Verán e no Campamento Multideportivo a través do Centro Sociocultural de Zas, no teléfono 981 751 398. No caso do Depor Campus Zas, as inscricións deberán realizarse a través da páxina web oficial da organización.